Шэрджэс (адыгэ) лъэпкъ зэгухьэныгъэхэм я унафэщIхэмрэ абыхэм хэтхэмрэ яхуэгъэза псалъэ
США-м, Канадэм, Европэм, Тыркум, Израилым, Иорданием, нэгъуэщI къэралхэми щыIэ шэрджэс (адыгэ) лъэпкъ зэгухьэныгъэхэм я унафэщIхэмрэ абыхэм хэтхэмрэ яхуэгъэза псалъэ
ПщIэ зыхуэтщI ди ныбжьэгъухэ!
Динрэ лъыкIэ ди къуэшу, ди шыпхъуу Сирием зыщызыубгъу зэпэщIэтыныгъэм и лейр илъэситIым щIигъуауэ зытехьэхэм къащхьэщыжынымкIэ фыкъыддэIэпыкъуну лъэIукIэ зыфхудогъазэ. КъуэкIыпIэ Гъунэгъум щыIэ а къэралыр зыгъэгулэз граждан зауэм цIыху минхэм я гъащIэр ихьащ икIи а зауэм и дэтхэнэ зы дакъикъэми нэхъыбэ ещI цIыхухэм, абыхэм адыгэ диаспорэри хиубыдэу, къатехьа лейм хэхъуэнымкIэ шынагъуэр.
Дэ долъагъу шэрджэс жылагъуэ зэгухьэныгъэ щхьэхуэхэм Сирием щыпсэу адыгэхэм шынагъуэр ящхьэщыхыным хуэунэтIауэ лэжьыгъэшхуэ ирагъэкIуэкIыну зэрыхущIэкъур. Ауэ быдэу ди фIэщ мэхъу гуманитар дэIэпыкъуныгъэ къудейкIэ Iуэхур зэрызэфIэмыкIынур.
Дэ ди Iуэху еплъыкIэхэр зэщIэдгъэуIуэу зэщIыгъуу дыкъэувын хуейщ залымыгъэм земыгъэубгъунымрэ Сирием щекIуэкI зауэр гъэувыIэнымрэ я телъхьэу. Адыгэ лъэпкъым щыщу иджыпсту екIуэкIхэм игъэпIейтей псори дэ къыхудоджэ а хэкум илъ мафIэр зи зэран лъэныкъуэхэм языхэзым и телъхьэу а зауэм хыхьэну хущIэкъухэм япэщIэувэну.
ДызэщIыгъумэ, дэ къэралхэмрэ дунейпсо зэгухьэныгъэхэмрэ я унафэщIхэм яхуэдгъэувыфынущ Сирие къэралым щекIуэкIхэм къарукIэ хэIэбэну зэрамурадыр къызэтрагъэувыIэну, абы папщIэ политикэ зэпсэлъэныгъэхэр жыджэру ирагъэкIуэкIыну, дунейпсо хабзэм и мардэхэм тету икIи Сирием щыпсэу, дин зэмылIэужьыгъуэхэр зезыхьэ, лъэпкъ зэхуэмыдэхэм къыхэкIа цIыхухэмрэ социальнэ гупхэмрэ я сэбэп зыхэлъхэр къалъытэу зэгурыIуэну. Быдэу ди фIэщ мэхъу мелуан куэд хъу адыгэ лъэпкъым и макъыр зыхуэфащэхэм зэрызэхахынур икIи Сирие Хьэрып Республикэм щыIэ щытыкIэр икIэщIыпIэкIэ гъэтэмэмыжынымкIэ ар сэбэп зэрыхъунур.
ДыныволъэIу мамырыгъэр зэтегъэувэжыным хуэунэтIа мы ди жэрдэмыр къыддэфIыгъыну, мы тхыгъэм фэри Iэ щIэвдзу фи къэралхэм, дунейпсо зэгухьэныгъэхэм я унафэщIхэмрэ цIыхубэ хъыбарегъащIэ IуэхущIапIэхэмрэ яхуевгъэхьыну.
ПщIэ фхуэзыщIхэу, Дунейпсо Адыгэ Хасэм и тхьэмадэ Сэхъурокъуэ Хьэутий, КъБР-м и «Адыгэ Хасэм» и тхьэмадэ ХьэфIыцIэ Мухьэмэд, КъБР-м и Жылагъуэ палатэм и тхьэмадэ Тау Пщыкъан, КъБР-м и Адыгэ жылагъуэ зэгухьэныгъэхэм я ЗэзыгъэуIу советым и тхьэмадэ Къалмыкъ Жылэбий, Къэбэрдей-Балъкъэр къэрал университетым и ректор Къарэмырзэ Барасбий, Къэбэрдей-Балъкъэр къэрал аграрнэ университетым и ректор Щыхьмырзэ Мухьэмэд, КъБР-м и Щэнхабзэ фондым и тхьэмадэ Вэрокъуэ Владимир, КъБР-м щыщу Абхъазым щызэуахэм я зэгухьэныгъэм и тхьэмадэ Яхэгуауэ Къазбэч, КъБР-м и Журналистхэм я союзым и тхьэмадэ Мэзыхьэ Борис, КъБР-м и Муслъымэнхэм я дин IуэхущIапIэм и тхьэмадэ Дзасэжь Хьэзрэталий.
